ماسکو (کیو این این ورلڈ) روس میں تعینات پاکستان کے سفیر فیصل نیاز ترمذی نے کریملن پیلس میں منعقدہ ایک باوقار تقریب کے دوران روسی صدر ولادیمیر پیوٹن کو اپنی سفارتی اسناد پیش کر دی ہیں۔ اس موقع پر دونوں ممالک کے درمیان تعلقات کو مزید مستحکم بنانے کے عزم کا اعادہ کیا گیا، جبکہ پاکستانی سفیر نے صدرِ پاکستان، وزیرِ اعظم اور پاکستانی عوام کی جانب سے نیک تمناؤں اور خیرسگالی کے پیغامات صدر پیوٹن تک پہنچائے۔ تقریب کے دوران دوطرفہ تعاون کے فروغ اور علاقائی استحکام کے حوالے سے اہم امور پر بھی تبادلہ خیال کیا گیا۔
روسی صدر ولادیمیر پیوٹن نے پاکستان کو روس کا قریبی شراکت دار قرار دیتے ہوئے دو طرفہ تعاون میں اضافے پر اطمینان کا اظہار کیا ہے۔ انہوں نے کہا کہ پاکستان اور روس کے درمیان تجارت، سفارت کاری، تعلیم، زراعت، صحت، صنعت، ریلوے اور آئی ٹی سمیت مختلف اہم شعبوں میں تعاون تیزی سے فروغ پا رہا ہے جو کہ دونوں اقوام کے لیے خوش آئند ہے۔ فیصل نیاز ترمذی نے 26 اکتوبر 2025 کو ماسکو میں اپنی سفارتی ذمہ داریاں سنبھالی تھیں اور ان کی ترجیحات میں توانائی، تجارت، رابطہ کاری اور عوامی روابط کے فروغ کے ساتھ ساتھ روس میں مقیم پاکستانی کمیونٹی کی فلاح و بہبود شامل ہے۔
فیصل نیاز ترمذی ایک سینئر اور تجربہ کار کیریئر سفارتکار ہیں جو اس سے قبل متحدہ عرب امارات اور کرغزستان میں بھی پاکستان کے سفیر کے طور پر گراں قدر خدمات انجام دے چکے ہیں۔ بین الاقوامی سفارتی محاذ پر ان کی بہترین کارکردگی کی بنیاد پر انہیں اعلیٰ اعزازات سے بھی نوازا جا چکا ہے۔ ماہرین کا خیال ہے کہ ان کی تعیناتی سے پاک روس تعلقات میں نئی وسعتیں پیدا ہوں گی اور معاشی و اسٹریٹجک شراکت داری کو مزید تقویت ملے گی۔