اسلام آباد (کیو این این ورلڈ)بنگلہ دیشی فضائیہ کے سربراہ ایئر چیف مارشل حسن محمود خان نے ایئر ہیڈ کوارٹرز اسلام آباد کا دورہ کیا، جہاں انہوں نے پاک فضائیہ کے سربراہ ایئر چیف مارشل ظہیر احمد بابر سدھو سے اہم ملاقات کی۔ ایئر ہیڈ کوارٹرز پہنچنے پر معزز مہمان کا پرجوش استقبال کیا گیا اور پاک فضائیہ کے چاق و چوبند دستے نے انہیں گارڈ آف آنر پیش کیا۔ ملاقات کے دوران دونوں ممالک کی فضائی افواج کے درمیان دفاعی تعلقات کو مزید مضبوط بنانے اور باہمی تعاون کو طویل المدتی اسٹریٹجک شراکت داری میں تبدیل کرنے کے عزم کا اظہار کیا گیا۔ ایئر چیف مارشل ظہیر احمد بابر سدھو نے اس موقع پر بنگلہ دیشی فضائیہ کو جامع تربیتی تعاون فراہم کرنے کی یقین دہانی کرائی اور فریقین کے درمیان سپر مشاق ٹرینر طیاروں کی تیز رفتار فراہمی سمیت طویل المدتی سپورٹ پر تفصیلی تبادلہ خیال کیا گیا۔
پاک فوج کے شعبہ تعلقات عامہ (آئی ایس پی آر) کے مطابق اس اہم ملاقات میں بنگلہ دیشی فضائیہ کے پرانے فلیٹ کی مینٹیننس، ایئر ڈیفنس ریڈار سسٹمز کی بہتری اور جے ایف-17 تھنڈر طیاروں کی ممکنہ خریداری جیسے اہم دفاعی امور پر بھی بات چیت ہوئی۔ بنگلہ دیشی وفد نے اپنے دورے کے دوران نیشنل آئی ایس آر (ISR)، سائبر کمانڈ اور ایرو اسپیس ٹیکنالوجی پارک کا بھی معائنہ کیا، جہاں انہیں جدید ترین تکنیکی سہولیات اور فضائی دفاعی صلاحیتوں کے بارے میں بریفنگ دی گئی۔ دونوں سربراہان نے اتفاق کیا کہ فضائی دفاع کے شعبے میں مشترکہ تعاون نہ صرف دونوں ممالک کے مفاد میں ہے بلکہ اس سے علاقائی استحکام اور تکنیکی مہارتوں کے تبادلے میں بھی مدد ملے گی۔