اوکاڑہ (کیو این این ورلڈ/ملک ظفر کی رپورٹ) کمشنر احمد عثمان جاوید کی خصوصی ہدایت پر پیرا فورس اور میونسپل کمیٹی کے اہلکاروں نے چنگی نمبر 7 پر تجاوزات کے خلاف بڑی کارروائی کی ہے جس کے دوران متعدد دکانداروں کو بھاری جرمانے عائد کر کے سامان قبضے میں لے لیا گیا۔ سب ڈویژنل انفورسمنٹ آفیسر وسیم جاوید کی زیرِ نگرانی کی جانے والی اس کارروائی میں انسدادِ تجاوزات مہم کے تحت مختلف مقامات کی چیکنگ کی گئی، جہاں فٹ پاتھوں اور سڑکوں پر غیر قانونی طور پر سامان رکھنے والے دکانداروں کو مجموعی طور پر 20 ہزار روپے جرمانہ کیا گیا اور تجاوزات کا سامان زیرِ تحویل لے لیا گیا۔ حکام کا کہنا ہے کہ یہ مہم شہر کی خوبصورتی کی بحالی اور ٹریفک کی روانی کو برقرار رکھنے کے لیے شروع کی گئی ہے تاکہ شہریوں کو آمد و رفت میں کسی دشواری کا سامنا نہ کرنا پڑے۔
اس موقع پر سب ڈویژنل انفورسمنٹ آفیسر وسیم جاوید نے گفتگو کرتے ہوئے کہا کہ تجاوزات سے پاک شہر اور بازار نہ صرف خوبصورتی کی علامت ہیں بلکہ حکومتِ پنجاب کے ویژن کا اہم حصہ ہیں، جس کے تحت عملی اقدامات کی پالیسی اپنائی گئی ہے۔ انہوں نے دکانداروں اور تاجر برادری پر زور دیا کہ وہ ذمہ داری کا مظاہرہ کریں اور عوامی راستوں میں سامان رکھ کر شہریوں کے لیے مشکلات پیدا کرنے سے گریز کریں۔ وسیم جاوید نے مزید واضح کیا کہ تجاوزات کا باعث بننے والے عناصر کے خلاف "زیرو ٹالرنس” پالیسی اپنائی جائے گی اور اس سلسلے میں بھرپور کارروائیوں کا سلسلہ مستقل بنیادوں پر جاری رکھا جائے گا تاکہ شہر کو مکمل طور پر تجاوزات سے پاک کیا جا سکے۔