ملائیشیا کی معروف اداکارہ اور سابق بیوٹی کوئن ایمی نور ٹینی نے انکشاف کیا ہے کہ ایک بااثر شخصیت نے انہیں تیسری بیوی بننے کے عوض ماہانہ بھاری رقم، عالیشان گھر اور گاڑی کی پیشکش کی، جسے انہوں نے دو ٹوک انداز میں مسترد کر دیا۔
بھارتی میڈیا رپورٹس کے مطابق 29 سالہ اداکارہ نے یہ بات 25 دسمبر کو ایک پوڈکاسٹ میں گفتگو کے دوران بتائی۔ ان کا کہنا تھا کہ مذکورہ وی وی آئی پی نے تیسری اہلیہ بننے کے بدلے ایک بنگلہ، ایک گاڑی، 10 ایکڑ زمین اور ہر ماہ 50 ہزار ملائیشین رنگٹ (جو پاکستانی کرنسی میں 34 لاکھ روپے سے زائد بنتے ہیں) بطور خرچ دینے کی پیشکش کی۔
ایمی نور ٹینی کے مطابق وہ اکثر کارپوریٹ ایونٹس کی میزبانی کرتی ہیں جہاں بااثر شخصیات سے ملاقات رہتی ہے۔ بعض افراد فون نمبر یا ملاقات کی خواہش کا اظہار کرتے ہیں، تاہم ایک شخص نے تمام حدود پار کرتے ہوئے انہیں تیسری بیوی بننے کی پیشکش کر دی، جسے انہوں نے فوراً رد کر دیا۔
اداکارہ نے بتایا کہ اس شخص کی عمر ان کے والد کے قریب تھی، جس کی وجہ سے یہ پیشکش انہیں مزید ناگوار گزری۔ اس انکشاف کے بعد سوشل میڈیا پر خواتین کی خودمختاری، طاقتور طبقے کے رویّوں اور معاشرتی اقدار سے متعلق نئی بحث نے جنم لے لیا ہے۔
