ننکانہ(نامہ نگار احسان اللہ ایاز) ڈی پی او ننکانہ فراز احمد نے پولیس لائنز میں منعقدہ ایک خصوصی تقریب کے دوران ان پولیس افسران اور جوانوں میں تعریفی اسناد اور نقد انعامات تقسیم کیے جنہوں نے 15 پکار کال پر انسانی جانیں بچانے کے لیے خون کے عطیات فراہم کیے۔ یہ اعزازات مینجنگ ڈائریکٹر سیف سٹی لاہور ڈی آئی جی احسن یونس کی جانب سے ان جوانوں کے لیے بھیجے گئے تھے جنہوں نے "ورچوئل بلڈ بینک” کے ذریعے شہریوں کی بروقت مدد کر کے انسانیت کی اعلیٰ مثال قائم کی۔ اسناد حاصل کرنے والوں میں انچارج پکار 15 عمر منظور، ہیڈ کانسٹیبل طاہر اور کانسٹیبلان اشفاق، اویس، عاصم، ناصر، سبیّل اور ارتضیٰ شامل ہیں، جنہوں نے ڈیوٹی کے ساتھ ساتھ سماجی خدمت کے جذبے کو بھی مقدم رکھا۔
تقریب سے خطاب کرتے ہوئے ڈی پی او فراز احمد نے کہا کہ وزیر اعلیٰ پنجاب محترمہ مریم نواز کی جانب سے ورچوئل بلڈ بینک کا قیام ایک تاریخی اور احسن اقدام ہے جس نے ہنگامی حالات میں خون کی فراہمی کے عمل کو انتہائی سہل بنا دیا ہے۔ انہوں نے اس بات پر زور دیا کہ ننکانہ پولیس کے جوان نہ صرف شہریوں کے جان و مال اور عزت کے محافظ ہیں بلکہ خون کا عطیہ دے کر زندگیاں بچانے میں بھی پیش پیش ہیں۔ انہوں نے تمام شہریوں سے اپیل کی کہ وہ ورچوئل بلڈ بینک کا حصہ بننے کے لیے خود کو 15 پر بطور ڈونر رجسٹر کروائیں تاکہ کسی بھی حادثے یا ایمرجنسی کی صورت میں انسانی جانوں کے ضیاع کو روکا جا سکے۔