اسلام آباد(کیو این این ورلڈ) انسداد دہشت گردی عدالت نے 9 مئی کے واقعات سے متعلق ڈیجیٹل دہشت گردی کے کیس کا محفوظ شدہ فیصلہ سناتے ہوئے عادل راجا، صابر شاکر، معید پیرزادہ، وجاہت سعید اور حیدر مہدی کو دو، دو بار عمر قید کی سزا سنا دی ہے۔ جج طاہر عباس سپرا نے مقدمے کی سماعت مکمل ہونے پر فیصلہ جاری کیا، جس میں ملزمان کو دیگر دفعات کے تحت مجموعی طور پر 35 سال قید اور فی کس 15 لاکھ روپے جرمانے کی سزا بھی دی گئی ہے۔ استغاثہ کی جانب سے راجا نوید حسین کیانی عدالت میں پیش ہوئے اور مجموعی طور پر 24 گواہان کے بیانات قلمبند کرائے گئے، جبکہ ملزمان کی عدم موجودگی کے باعث عدالت نے قانون کے مطابق گلفام اشرف گورائیہ ایڈووکیٹ کو ان کا وکیل مقرر کر کے ٹرائل مکمل کیا۔
عدالتی فیصلے کے مطابق یہ سزائیں تھانہ آبپارہ اور تھانہ رمنا میں درج مقدمات کی بنیاد پر سنائی گئی ہیں، جن میں شاہین صہبائی اور سید اکبر حسین بھی مختلف دفعات کے تحت سزا پانے والوں میں شامل ہیں۔ پراسیکیوشن نے موقف اختیار کیا تھا کہ ملزمان نے ڈیجیٹل پلیٹ فارمز کے ذریعے ریاستی اداروں کے خلاف اشتعال انگیزی اور دہشت گردی کو فروغ دیا، جس پر عدالت نے تمام شواہد اور گواہان کے بیانات کی روشنی میں انہیں مجرم قرار دیا۔ واضح رہے کہ انسداد دہشت گردی کے قوانین کے تحت ملزمان کی عدم موجودگی میں بھی ٹرائل کی کارروائی مکمل کرنے کی گنجائش موجود ہے، جس کا سہارا لیتے ہوئے عدالت نے یہ سنگین سزائیں سنائی ہیں۔