اسلام آباد: پاکستان کے لیے ایک ارب 20 کروڑ ڈالر کی نئی قسط کی منظوری کے لیے آئی ایم ایف کے انتظامی بورڈ کا اہم اجلاس آج منعقد ہوگا۔ اجلاس میں توسیعی فنڈ سہولت کے تحت ایک ارب ڈالر جبکہ قدرتی آفات سے بچاؤ اور پائیدار ترقی کے پروگرام کے لیے مزید 20 کروڑ ڈالر کی منظوری پر غور کیا جائے گا۔
آئی ایم ایف نے شرط رکھی تھی کہ بورڈ اجلاس سے قبل پاکستان کرپشن اور گورننس سے متعلق تفصیلی تجزیاتی رپورٹ جاری کرے، جو پاکستان نے گزشتہ روز جاری کر دی ہے۔
واضح رہے کہ پاکستان اور آئی ایم ایف کے درمیان اکتوبر میں اسٹاف سطح کا معاہدہ طے پایا تھا، جو 24 ستمبر سے 8 اکتوبر تک کراچی، اسلام آباد اور واشنگٹن میں مذاکرات کے بعد ممکن ہوا۔ ان مذاکرات میں مالی کارکردگی، مالیاتی پالیسی، اصلاحات اور موسمیاتی اقدامات کا تفصیلی جائزہ لیا گیا۔
آئی ایم ایف مشن پاکستان کی معاشی پیش رفت پر پہلے ہی اطمینان کا اظہار کر چکا ہے، جبکہ اپنی رپورٹ میں اسٹیٹ بینک کی سخت مالیاتی پالیسی کی تعریف کرتے ہوئے اسے آئندہ بھی برقرار رکھنے کی سفارش کی گئی ہے۔