گھوٹکی (نامہ نگارمشتاق علی لغاری)شکارپور کے کچے میں ڈاکوؤں کے خلاف جاری پولیس آپریشن میں زخمی ہونے والے ڈی ایس پی پارس بکھرانی اور ڈی ایس پی ظہور سومرو کی شادی کی دوسری سالگرہ ہسپتال میں منائی گئی۔ دونوں افسران کے ساتھ دو دیگر اہلکار بھی سکھر کے ہسپتال میں زیرِ علاج ہیں، جہاں ان کی حالت پہلے سے بہتر بتائی جا رہی ہے۔
زخمی اہلکاروں کی حوصلہ افزائی کے لیے میئر سکھر ارسلان شیخ بھی اسپتال پہنچے اور ڈی ایس پی میاں بیوی کے لیے کیک کاٹا۔
اسی دوران آئی جی سندھ غلام نبی میمن نے بھی زخمی اہلکاروں کی عیادت کی اور میڈیا سے گفتگو میں بتایا کہ جدید اسلحے اور مربوط حکمت عملی کی بدولت پولیس ڈاکوؤں کے خلاف کارروائیوں میں نمایاں کامیابیاں حاصل کر رہی ہے۔
انہوں نے کہا کہ شکارپور، کشمور، گھوٹکی اور جیکب آباد میں جاری آپریشنز کے دوران اب تک تقریباً 200 جرائم پیشہ افراد ہلاک اور 550 سے زائد زخمی حالت میں گرفتار کیے جا چکے ہیں۔ شکارپور کے کئی علاقوں میں گھر گھر سرچ آپریشن کے دوران بھاری مقدار میں اسلحہ اور منشیات بھی برآمد کی گئی ہیں۔
واضح رہے کہ چند دن قبل شکارپور میں پولیس آپریشن میں 9 ڈاکو ہلاک جبکہ ڈی ایس پی میاں بیوی سمیت چار پولیس اہلکار زخمی ہوئے تھے۔