ٹھٹھہ (ڈسٹرکٹ رپورٹربلاول سموں) اندرون سندھ کے علاقے ٹھٹھہ میں قومی شاہراہ پر ایک المناک ٹریفک حادثہ پیش آیا ہے جہاں ٹرک اور موٹر سائیکل کے درمیان ہونے والے ہولناک تصادم کے نتیجے میں دو نوجوان موقع پر ہی دم توڑ گئے۔ ریسکیو ذرائع کے مطابق یہ حادثہ مکلی کے مقام پر اس وقت پیش آیا جب تیز رفتار ٹرک نے موٹر سائیکل کو اپنی لپیٹ میں لے لیا، جس کے نتیجے میں موٹر سائیکل پر سوار مزمل شیخ اور عبداللہ شاہ شدید زخمی ہوئے اور زخموں کی تاب نہ لاتے ہوئے موقع پر ہی جاں بحق ہو گئے۔ واقعے کی اطلاع ملتے ہی ریسکیو ٹیمیں جائے وقوعہ پر پہنچ گئیں اور جاں بحق ہونے والے دونوں نوجوانوں کی لاشوں کو ضروری کارروائی کے لیے سول ہسپتال مکلی منتقل کر دیا گیا، جہاں قانونی تقاضے پورے کرنے کے بعد میتیں لواحقین کے حوالے کی جائیں گی۔
دوسری جانب مقامی پولیس نے بھی اطلاع ملتے ہی جائے حادثہ پر پہنچ کر صورتحال کا جائزہ لیا اور حادثے کا سبب بننے والے ٹرک کو اپنی تحویل میں لے کر واقعے کی تحقیقات کا باقاعدہ آغاز کر دیا ہے۔ پولیس حکام کا ابتدائی تفتیش کے حوالے سے کہنا ہے کہ حادثہ بظاہر تیز رفتاری اور غفلت کے باعث پیش آیا ہے، تاہم مزید حقائق جاننے کے لیے عینی شاہدین کے بیانات قلمبند کیے جا رہے ہیں۔ نوجوانوں کی اچانک موت کی خبر ملتے ہی علاقے میں کہرام مچ گیا اور فضا سوگوار ہو گئی۔ پولیس نے یقین دہانی کرائی ہے کہ حادثے کے ذمہ داروں کے خلاف قانون کے مطابق سخت کارروائی عمل میں لائی جائے گی تاکہ شاہراہوں پر قیمتی انسانی جانوں کے ضیاع کو روکا جا سکے۔