کراچی(کیو این این ورلڈ) ملک بھر میں سونے کی قیمتوں میں کمی کا رجحان مسلسل چوتھے روز بھی جاری رہا اور سال 2026 کے پہلے ہی دن سونے کے نرخوں میں بڑی کمی ریکارڈ کی گئی۔ آل پاکستان صرافہ جیمز اینڈ جیولرز ایسوسی ایشن کی جانب سے جاری کردہ اعداد و شمار کے مطابق فی تولہ سونے کی قیمت میں 2400 روپے کی نمایاں کمی ہوئی ہے، جس کے بعد مقامی صرافہ بازاروں میں فی تولہ سونا 4 لاکھ 54 ہزار 562 روپے کی سطح پر آگیا ہے۔ اسی طرح 10 گرام سونے کے بھاؤ میں بھی 2058 روپے کی کمی دیکھی گئی اور اس کی نئی قیمت 3 لاکھ 89 ہزار 713 روپے مقرر کی گئی ہے۔ واضح رہے کہ گزشتہ چار دنوں کے دوران سونے کی قیمت میں مجموعی طور پر 21 ہزار ایک سو روپے کی بڑی کمی واقع ہوئی ہے جس سے خریداروں میں خوشی کی لہر دوڑ گئی ہے۔
دوسری جانب عالمی منڈی میں بھی پیلی دھات کی قیمتوں میں گراوٹ کا سلسلہ جاری ہے، جہاں بین الاقوامی مارکیٹ میں سونے کی فی اونس قیمت 24 ڈالر کی کمی کے ساتھ 4 ہزار 322 ڈالر کی سطح پر آگئی ہے۔ معاشی ماہرین کا کہنا ہے کہ عالمی مارکیٹ میں قیمتوں کے استحکام اور مقامی سطح پر روپے کی قدر میں بہتری کے باعث سونے کی قیمتوں میں یہ نمایاں کمی دیکھنے میں آ رہی ہے، جس کا براہ راست فائدہ عام صارفین اور جیولری کی صنعت سے وابستہ افراد کو پہنچے گا۔