واشنگٹن (کیو این این ورلڈ) ٹیسلا اور اسپیس ایکس کے بانی ایلون مسک نے ایران میں جاری احتجاج اور انٹرنیٹ کی طویل معطلی کے پیش نظر صارفین کو اسٹار لنک سیٹلائٹ سروس کے ذریعے مفت انٹرنیٹ فراہم کرنے کا اعلان کر دیا ہے۔ امریکی میڈیا رپورٹس کے مطابق، ایران میں کئی روز سے جاری ڈیجیٹل بلیک آؤٹ کی وجہ سے جہاں شہریوں کو شدید مشکلات کا سامنا ہے، وہیں ہلاکتوں کی درست تعداد معلوم کرنا بھی ناممکن ہو چکا ہے، جس کے بعد ایلون مسک نے انسانی ہمدردی کی بنیاد پر یہ قدم اٹھایا ہے۔ رپورٹ میں بتایا گیا ہے کہ ایران میں موجود اسٹار لنک کے تمام فعال اور غیر فعال اکاؤنٹس کی سبسکرپشن فیس معاف کر کے انہیں فوری طور پر بحال کر دیا گیا ہے تاکہ ایرانی عوام عالمی دنیا سے رابطے میں رہ سکیں۔
یہ پیشرفت امریکی صدر ڈونلڈ ٹرمپ اور ایلون مسک کے درمیان ہونے والے حالیہ ٹیلیفونک رابطے کے بعد سامنے آئی ہے، جس میں صدر ٹرمپ نے ایران میں انٹرنیٹ کی بحالی کے لیے ایلون مسک سے تعاون کی درخواست کی تھی۔ ایلون مسک نے صدر ٹرمپ کو یقین دلایا تھا کہ ان کی کمپنی ایرانی عوام کو سینسر شپ سے پاک انٹرنیٹ تک رسائی فراہم کرے گی۔ دوسری جانب، ایرانی حکومت نے اس مفت سروس کو روکنے کے لیے مختلف مقامات پر جدید جیمرز نصب کیے ہیں تاکہ سیٹلائٹ سگنلز کو متاثر کیا جا سکے، تاہم تکنیکی ماہرین کا کہنا ہے کہ بیشتر علاقوں میں اسٹار لنک کی سروس کامیابی سے بحال ہے اور لوگ اسے متبادل ذریعے کے طور پر استعمال کر رہے ہیں۔
امریکی میڈیا کے مطابق، اسٹار لنک کی مفت فراہمی نے ایرانی حکام کے لیے نئی مشکلات کھڑی کر دی ہیں، کیونکہ اب مظاہرین کے لیے احتجاج کی ویڈیوز اور معلومات بیرونی دنیا تک پہنچانا آسان ہو جائے گا۔ اس سے قبل بھی ایلون مسک یوکرین اور وینزویلا جیسے تنازعات زدہ علاقوں میں اسی طرح کی مفت انٹرنیٹ خدمات فراہم کر چکے ہیں۔ مبصرین کا ماننا ہے کہ ایلون مسک اور صدر ٹرمپ کے درمیان بڑھتے ہوئے تعاون نے عالمی سیاست میں ٹیکنالوجی کے کردار کو مزید اہمیت دے دی ہے، جبکہ ایران نے اس اقدام کو اپنی خود مختاری میں مداخلت قرار دیتے ہوئے سخت ردعمل کا اشارہ دیا ہے۔