ڈیرہ غازیخان: واسا کے ترقیاتی کام وبالِ جان، گندا پانی گھروں میں داخل، گلیاں بند

ڈیرہ غازی خان (کیو این این ورلڈ/نیوز رپورٹر شاہد خان) واسا کی جانب سے یونین کونسل 17 کے علاقے عبداللہ ٹاؤن کالونی میں جاری پائپ لائن بچھانے کا ترقیاتی کام علاقہ مکینوں کے لیے شدید مشکلات کا باعث بن گیا ہے، جہاں بنیادی سہولیات کی فراہمی کے بجائے شہریوں کو الٹا مسائل کا سامنا کرنا پڑ رہا ہے۔

تفصیلات کے مطابق پائپ لائن بچھانے کے دوران انتظامیہ نے پہلے سے موجود نکاسی آب کی نالیوں کو توڑ دیا، جس کے نتیجے میں گندا پانی گھروں میں داخل ہونا شروع ہو گیا ہے۔ مکینوں کا کہنا ہے کہ علاقے میں پانی کے نکاس کا جو واحد مؤثر راستہ موجود تھا، وہ بھی ختم کر دیا گیا ہے، جس سے صورتحال انتہائی خراب ہو چکی ہے اور تعفن و بیماریوں کے خدشات بڑھ گئے ہیں۔

مزید برآں، ترقیاتی کام کے دوران تمام گلیوں کو بیک وقت کھود دیا گیا ہے، جس کی وجہ سے آمدورفت مکمل طور پر معطل ہو کر رہ گئی ہے۔ شہریوں کو روزمرہ کے معمولات، دفاتر، اسکولوں اور ہسپتالوں تک رسائی میں شدید مشکلات کا سامنا ہے۔ گلیوں میں چلنے کے لیے کوئی مناسب راستہ باقی نہیں رہا، جس کے باعث بزرگ افراد، خواتین، بچوں اور مریضوں کو خاص طور پر پریشانی اٹھانا پڑ رہی ہے۔

اہل علاقہ نے شکایت کی ہے کہ کام کے دوران نہ تو متبادل راستوں کا بندوبست کیا گیا اور نہ ہی نکاسی آب کے نظام کو برقرار رکھنے کے لیے کوئی مؤثر حکمت عملی اپنائی گئی، جس سے مسائل میں مزید اضافہ ہو گیا ہے۔

مکینوں نے ضلعی انتظامیہ اور متعلقہ حکام سے پرزور مطالبہ کیا ہے کہ فوری طور پر صورتحال کا نوٹس لیا جائے اور جہاں پائپ لائن بچھائی جا رہی ہے وہاں نکاسی آب کے لیے پلاسٹک پائپ بھی نصب کیے جائیں تاکہ گندا پانی گھروں میں داخل نہ ہو اور سیوریج کا نظام بہتر بنایا جا سکے۔

اہل علاقہ نے خبردار کیا ہے کہ اگر بروقت اقدامات نہ کیے گئے تو یہ مسئلہ مزید شدت اختیار کر سکتا ہے، جس سے نہ صرف شہریوں کی مشکلات بڑھیں گی بلکہ صحت عامہ کے سنگین مسائل بھی جنم لے سکتے ہیں۔