ڈیرہ غازی خان میں مثالی پولیسنگ کی روشن داستان
ڈی پی او صادق حسین بلوچ. جرأت، قیادت اور عوامی خدمت کی علامت
تحریر:حسنین کامران
ڈیرہ غازی خان جیسے حساس، وسیع اور اسٹریٹجک اہمیت کے حامل ضلع میں امن و امان قائم رکھنا کسی بڑے امتحان سے کم نہیں، مگر ڈسٹرکٹ پولیس آفیسر صادق حسین بلوچ نے اپنی غیر معمولی پیشہ ورانہ صلاحیت، بروقت اور جرات مندانہ فیصلوں، فولادی نظم و ضبط اور عوام دوست طرزِ قیادت سے اس امتحان کو مثالی کامیابی میں بدل دیا ہے۔
وہ محض دفتری افسر نہیں بلکہ ایک متحرک فیلڈ کمانڈر ہیں، جو فرنٹ لائن پر موجود رہ کر اپنے جوانوں کا حوصلہ بڑھاتے، جرائم پیشہ عناصر کے لیے خوف اور عوام کے لیے اعتماد کی علامت بن چکے ہیں۔
سرپرائز وزٹس۔ نظم و ضبط اور جوابدہی کی عملی مثال
ڈی پی او صادق حسین بلوچ کے رات گئے تھانہ صدر، تھانہ بی ڈویژن، تھانہ سٹی، تھانہ سول لائن اور تھانہ کوٹ مبارک کے اچانک دورے اس امر کا واضح ثبوت ہیں کہ ان کے نزدیک نظم و ضبط اور شفافیت محض نعرہ نہیں بلکہ عملی ترجیح ہے۔
ان دوروں کے دوران اہلکاروں کی حاضری، ڈیوٹی روسٹر، ریکارڈ و حوالات، فرنٹ ڈیسک کی کارکردگی، تھانوں کا ماحول، صفائی اور سیکیورٹی کا باریک بینی سے جائزہ لیا گیا۔ واضح ہدایات جاری کی گئیں کہ شہریوں کے مسائل کا فوری حل، خوش اخلاقی اور قانون کے مطابق برتاؤ ہر صورت یقینی بنایا جائے۔
گشت، پیٹرولنگ اور جرائم کے خلاف زیرو ٹالرنس
ڈی پی او صادق بلوچ نے ضلع بھر میں پیٹرولنگ سسٹم، رسپانس ٹائم اور گشت کے نظام کو خود مانیٹر کرتے ہوئے جرائم کے خلاف مؤثر حکمتِ عملی نافذ کی۔
رات کے گشت میں بہتری، مشکوک عناصر کی سخت نگرانی اور بلاامتیاز کارروائیوں کے نتیجے میں ہوائی فائرنگ، تخریب کاری، موٹر سائیکل جلانے اور ڈکیتی و راہزنی جیسے واقعات میں ملوث ملزمان کو گرفتار کیا گیا اور اسلحہ برآمد ہوا، جو زیرو ٹالرنس پالیسی کا عملی ثبوت ہے۔
کچہری چوک فائرنگ واقعہ ۔بروقت ردِعمل کی شاندار مثال
کچہری چوک عدالت کے باہر فائرنگ کے واقعے میں دو افراد کے زخمی ہونے پر پولیس نے چند لمحوں میں پیشہ ورانہ مہارت کا مظاہرہ کرتے ہوئے ملزمان خورشید اور حنظلہ کو موقع پر ہی گرفتار کر لیا اور اسلحہ برآمد کیا۔
اطلاع ملتے ہی ڈی پی او صادق بلوچ کا فوری طور پر جائے وقوعہ پر پہنچنا، حالات کا جائزہ لینا اور ٹیم کی حوصلہ افزائی اس بات کا واضح پیغام تھا کہ قانون شکنی کسی صورت برداشت نہیں کی جائے گی۔
قانون کی بالادستی ۔ پولیس پر حملہ، فوری گرفتاری
بغیر نمبر پلیٹ موٹر سائیکل بند کروانے پر محافظ اسکواڈ اہلکاروں پر حملے کے واقعے میں تھانہ صدر پولیس کی فوری کارروائی نے ثابت کر دیا کہ قانون سب کے لیے برابر ہے۔
ڈی پی او صادق بلوچ کی قیادت میں پولیس نے واضح پیغام دیا:
“قانون سے الجھنے کے بجائے اس کی پاسداری ہی ذمہ دار شہری ہونے کا پہلا اصول ہے۔”
انسدادِ دہشت گردی موک ایکسرسائز ۔ پیشگی تیاری اور ہم آہنگی
ڈی پی او صادق حسین بلوچ کی ہدایت پر تھانہ گدائی اور تھانہ کوٹ مبارک کے علاقوں میں پولیس اور دیگر قانون نافذ کرنے والے اداروں کے ساتھ انسدادِ دہشت گردی موک ایکسرسائز کا انعقاد کیا گیا۔
ان مشقوں کا مقصد ممکنہ دہشت گردی سے نمٹنے کی تیاری، فوری ردِعمل اور اداروں کے درمیان ہم آہنگی کو مزید مضبوط بنانا تھا تاکہ ضلع ہر خطرے کے مقابلے کے لیے تیار رہے۔
شہداء کے خاندان۔ وفا، عزت اور عملی وابستگی
ڈی پی او صادق بلوچ نے پولیس کے عظیم شہداء کو خراجِ عقیدت پیش کرتے ہوئے شہید سب انسپکٹر ارشاد حسین کی بیٹی کی شادی میں خصوصی شرکت کی اور ایک عظیم روایت کو زندہ رکھا۔
ان کا کہنا:
“ڈیرہ غازی خان پولیس اپنے شہداء کے خاندانوں کو کبھی تنہا نہیں چھوڑتی”
محض الفاظ نہیں بلکہ عملی حقیقت ہے۔
عوامی سہولیات، سیف سٹی اور جدید پولیسنگ
پولیس لائن، سیف سٹی، ہارس رائیڈنگ اسکول، پولیس خدمت مرکز اور ڈرائیونگ لائسنس برانچ کے دورے اس بات کا ثبوت ہیں کہ ڈی پی او صادق بلوچ جدید، عوام دوست اور ٹیکنالوجی بیسڈ پولیسنگ پر یقین رکھتے ہیں۔
سیف سٹی کیمروں کے ذریعے نگرانی، گھر کی دہلیز پر لائسنس سہولیات اور کمیونٹی پولیسنگ نے عوام کے اعتماد کو مزید مضبوط کیا ہے۔
قیادت وہ جو مثال بن جائے
ڈسٹرکٹ پولیس آفیسر صادق حسین بلوچ نے مختصر عرصے میں جرات مندانہ قیادت، شفاف و مؤثر پولیسنگ، عوام دوست رویے، شہداء سے وفا اور جرائم کے خلاف فیصلہ کن کارروائیوں کے ذریعے ڈیرہ غازی خان پولیس کو ایک متحرک، باوقار اور مثالی فورس کے طور پر منوایا ہے۔
ان کی قیادت میں ڈیرہ غازی خان پولیس نہ صرف جرائم کے خلاف سینہ سپر ہے بلکہ ایک محفوظ، پرامن اور مہذب معاشرے کی تشکیل میں بھی کلیدی کردار ادا کر رہی ہے—جو واقعی قابلِ تحسین اور قابلِ تقلید ہے۔