کوئٹہ (کیو این این ورلڈ)وزیراعلیٰ بلوچستان سرفراز بگٹی نے کہا ہے کہ ریاست کے خلاف بے بنیاد پروپیگنڈا معاشرتی انتشار اور تشدد کو جنم دیتا ہے، اس لیے نوجوانوں کو درست سمت دکھانا اور حقائق سے آگاہ کرنا وقت کی اہم ضرورت ہے۔ ان خیالات کا اظہار انہوں نے "سینٹر آف ایکسیلینس برائے انسدادِ تشدد” سے متعلق منعقدہ ایک اعلیٰ سطحی اجلاس کی صدارت کرتے ہوئے کیا، جس میں چیف سیکرٹری بلوچستان شکیل قادر خان، ایڈیشنل چیف سیکرٹری داخلہ حمزہ شفقات اور آئی جی پولیس بلوچستان محمد طاہر خان سمیت دیگر اعلیٰ حکام نے شرکت کی۔ وزیراعلیٰ نے واضح کیا کہ سینٹر آف ایکسیلینس تحقیق، آگاہی اور انتہاپسندی کے تدارک کے لیے ایک مؤثر پلیٹ فارم ثابت ہوگا اور اس کے ذریعے تعلیمی اداروں و سوشل میڈیا پر مثبت بیانیے کو فروغ دیا جائے گا تاکہ امن و امان کے قیام کے لیے نوجوانوں میں شعور بیدار کیا جا سکے۔
سرفراز بگٹی نے ایک تاریخی انتظامی فیصلے کا تذکرہ کرتے ہوئے بتایا کہ پورے بلوچستان میں لیویز فورس کو پولیس میں ضم کر دیا گیا ہے، جس سے صوبے میں یکساں قانون کے نفاذ سے متعلق دیرینہ انتظامی ابہام کا خاتمہ ہو گیا ہے۔ انہوں نے کہا کہ اس فیصلے سے ریاستی ذمہ داری واضح ہو جائے گی اور عوام کے تحفظ کا دائرہ کار مزید مضبوط ہوگا کیونکہ انتہاپسندی کے تدارک کے لیے ادارہ جاتی تعاون اور جدید حکمتِ عملی ناگزیر ہے۔ حکومت کی اولین ترجیح ہے کہ صوبے کے ہر حصے میں قانون کی حکمرانی کو یقینی بنایا جائے اور کسی بھی قسم کے منفی پروپیگنڈے کا مقابلہ کرنے کے لیے نوجوانوں کو ریاست کے مضبوط ستون کے طور پر شامل کیا جائے۔