بادغیس (کیو این این ورلڈ) افغانستان کے صوبہ بادغیس میں ایک فوجی اڈے پر 11 طالبان جنگجوؤں کے مبینہ طور پر زہر خورانی کا شکار ہونے کی اطلاع سامنے آئی ہے۔ افغان میڈیا کے مطابق واقعہ گزشتہ رات پیش آیا، جہاں طالبان کی تھرڈ انفنٹری بریگیڈ سے وابستہ 11 اہلکاروں کو کھانے میں مبینہ طور پر زہر دیا گیا۔
افغان میڈیا نے ذرائع کے حوالے سے بتایا کہ زہر خورانی کا شکار ہونے والے تمام افراد طالبان کی تھرڈ انفنٹری بریگیڈ کے ارکان ہیں۔ واقعے کے بعد ان کی حالت بگڑنے پر طالبان کے ہیلی کاپٹر صبح تقریباً 5 بجے بادغیس پہنچے اور متاثرہ جنگجوؤں کو طبی امداد کے لیے صوبہ ہرات منتقل کردیا گیا۔
ذرائع کے مطابق واقعے کے سلسلے میں فوجی اڈے کے باورچی کو حراست میں لے لیا گیا ہے، جس پر مبینہ طور پر جنگجوؤں کے کھانے میں زہر ملانے کا الزام ہے۔ تاہم یہ واضح نہیں ہوسکا کہ مبینہ زہر خورانی کی اصل وجہ کیا تھی اور باورچی نے یہ اقدام کیوں کیا۔
طالبان حکومت کی جانب سے تاحال واقعے کی باضابطہ تصدیق یا تردید نہیں کی گئی، نہ ہی زہر خورانی کا شکار ہونے والے جنگجوؤں کی موجودہ حالت یا واقعے کے محرکات کے بارے میں کوئی سرکاری بیان جاری کیا گیا ہے۔
واقعے کی آزادانہ طور پر بھی تصدیق نہیں ہوسکی، اس لیے افغان میڈیا کی جانب سے سامنے آنے والی اطلاعات کو فی الحال مبینہ واقعے کے طور پر ہی دیکھا جا رہا ہے۔