اسلام آباد (کیو این این ورلڈ): ملک بھر میں آج یومِ پاکستان روایتی جوش و جذبے کے ساتھ منایا جا رہا ہے۔ دن کا آغاز توپوں کی سلامی سے ہوا جبکہ مختلف شہروں میں سادگی اور وقار کے ساتھ پرچم کشائی کی تقریبات منعقد کی جا رہی ہیں۔
صدر آصف علی زرداری نے قوم کو یومِ پاکستان کی دلی مبارکباد دیتے ہوئے اپنے پیغام میں کہا کہ 23 مارچ 1940 کو برصغیر کے مسلمانوں نے قراردادِ پاکستان منظور کر کے ایک علیحدہ وطن کے قیام کا نظریہ پیش کیا، جہاں وہ اسلامی اقدار کے مطابق آزادانہ زندگی گزار سکیں۔ انہوں نے کہا کہ یہ دن ہمیں یاد دلاتا ہے کہ قومی عزم کو حقیقت میں بدلنے کے لیے اتحاد ناگزیر ہے۔
صدر مملکت کا کہنا تھا کہ قیامِ پاکستان کے وقت ملک کو بے شمار چیلنجز کا سامنا تھا، تاہم قوم نے باہمی تعاون سے مشکلات پر قابو پایا اور ہر شعبے میں نمایاں کامیابیاں حاصل کیں۔ انہوں نے دفاعی صلاحیت، جوہری پروگرام اور دہشت گردی کے خلاف کامیاب جنگ کو قومی عزم کی مثال قرار دیا۔
وزیراعظم شہباز شریف نے بھی یومِ پاکستان پر قوم کو مبارکباد دیتے ہوئے کہا کہ 23 مارچ جنوبی ایشیا کی تاریخ کا اہم سنگ میل ہے۔ انہوں نے کہا کہ برصغیر کی مسلم قیادت نے ایک ایسی ریاست کا تصور پیش کیا جہاں مسلمانوں کے آئینی اور سیاسی حقوق کا تحفظ یقینی بنایا جا سکے۔
وزیراعظم نے مشرقِ وسطیٰ کی موجودہ صورتحال پر تشویش کا اظہار کرتے ہوئے کہا کہ پاکستان ایک ذمہ دار ریاست کے طور پر متوازن اور فعال سفارت کاری جاری رکھے ہوئے ہے۔ انہوں نے کہا کہ چیلنجز کے باوجود معیشت کو پائیدار ترقی کی راہ پر گامزن کر دیا گیا ہے اور مثبت اقتصادی اشاریے درست سمت کی نشاندہی کرتے ہیں۔
انہوں نے کہا کہ سیکیورٹی کے میدان میں افواجِ پاکستان نے دشمن کو بھرپور جواب دیا اور دہشت گردی کے خلاف جاری آپریشنز میں نمایاں کامیابیاں حاصل کیں، جبکہ بہادر افسران اور جوانوں کی قربانیاں قابلِ فخر ہیں۔ وزیراعظم نے مقبوضہ کشمیر کے عوام کی اخلاقی، سیاسی اور سفارتی حمایت جاری رکھنے کے عزم کا بھی اعادہ کیا۔
دوسری جانب Inter-Services Public Relations (آئی ایس پی آر) کی جانب سے جاری بیان میں مسلح افواج نے یومِ پاکستان کی 86ویں سالگرہ پر قوم کو مبارکباد پیش کی۔ بیان میں کہا گیا کہ 23 مارچ ایمان، امید اور استقامت سے بھرپور قومی عزم کی عکاسی کرتا ہے اور پاکستان جمہوریت کے سائے تلے ترقی کی راہ پر گامزن ہے۔
آئی ایس پی آر کے مطابق مسلح افواج، عوام اور قانون نافذ کرنے والے ادارے دہشت گردی اور ہر قسم کی جارحیت کے خلاف متحد اور پرعزم ہیں، اور ملک کے استحکام و سلامتی کے لیے ہر وقت تیار ہیں۔