واشنگٹن (کیو این این ورلڈ)اسرائیلی صدر کمزور شخصیت ہیں، نیتن یاہو نہ ہوتے تو اسرائیل کا وجود بھی نہ ہوتا: ڈونلڈ ٹرمپ
امریکہ کے صدر ڈونلڈ ٹرمپ نے اسرائیل کے صدر آئزک ہرزوگ کو کمزور شخصیت قرار دیتے ہوئے کہا ہے کہ اگر اسرائیلی وزیر اعظم بنیامین نیتن یاہو نہ ہوتے تو شاید آج اسرائیل کا وجود بھی نہ ہوتا۔
ایک اسرائیلی ٹی وی چینل کو دیے گئے انٹرویو میں ڈونلڈ ٹرمپ نے کہا کہ آئزک ہرزوگ کمزور اور غیر مؤثر شخصیت ہیں اور وہ معافی کے اختیار کو استعمال کرتے ہوئے اسے بنیامین نیتن یاہو کے سر پر لٹکائے ہوئے ہیں۔ انہوں نے کہا کہ ہرزوگ نے نیتن یاہو کو معافی دینے سے انکار کیا ہے۔
ٹرمپ نے بنیامین نیتن یاہو کی تعریف کرتے ہوئے کہا کہ اگر وہ وزیر اعظم نہ ہوتے تو ممکن ہے آج اسرائیل موجود ہی نہ ہوتا۔ انہوں نے کہا کہ وہ مکمل طور پر نیتن یاہو کے ساتھ کھڑے ہیں۔
جب ٹرمپ سے پوچھا گیا کہ کیا کوئی اور رہنما وہ کامیابیاں حاصل کر سکتا تھا جو انہوں نے اور بنیامین نیتن یاہو نے مل کر حاصل کی ہیں تو انہوں نے جواب دیا کہ ان کے خیال میں ایسا ممکن نہیں۔
ایران کے ساتھ جاری کشیدگی کے حوالے سے سوال کے جواب میں ٹرمپ نے کہا کہ ممکن ہے دیگر ممالک بھی اس معاملے میں شامل ہوں، کم از کم آبنائے ہرمز کو کھلا رکھنے کے لیے۔ انہوں نے کہا کہ بہت سے ممالک اپنی تیل کی ضروریات اسی راستے سے پوری کرتے ہیں، اس لیے انہیں بھی اس معاملے میں اپنا کردار ادا کرنا چاہیے۔