سال 2025 پاکستانی شوبز انڈسٹری کے لیے جہاں کامیابیوں کا پیغام لایا، وہیں یہ سال کئی نامور اور لیجنڈری فنکاروں کی جدائی کے باعث انتہائی سوگوار بھی رہا۔ رواں برس انڈسٹری نے اپنے کئی ایسے روشن ستاروں کو کھو دیا جن کی کمی مدتوں محسوس کی جائے گی، تاہم دو واقعات ایسے تھے جنہوں نے پوری فنکار برادری اور مداحوں کو ہلا کر رکھ دیا۔ ڈرامہ انڈسٹری کی سینئر اداکارہ عائشہ خان کی 20 جون کو کراچی کے علاقے گلشن اقبال میں واقع فلیٹ سے کئی روز پرانی لاش برآمد ہوئی، جو تعفن پھیلنے پر پڑوسیوں کی اطلاع پر ملنے والے المناک سراغ کے بعد سامنے آئی۔ اسی طرح 8 جولائی کو کراچی کے ڈیفنس کے ایک فلیٹ سے اداکارہ حمیرا اصغر کی ناقابلِ شناخت لاش ملی، جس کے بارے میں میڈیکل رپورٹ میں انکشاف ہوا کہ ان کا انتقال ماہ اکتوبر میں ہی ہو چکا تھا اور لاش تقریباً 9 ماہ پرانی تھی۔ ان کی تدفین بعد ازاں لاہور میں کی گئی اور پولیس نے تحقیقات کے بعد موت کو طبعی قرار دیا۔
رواں برس کے آغاز میں اپریل 2025 کے دوران معروف کامیڈین جاوید کوڈو طویل علالت کے بعد خالقِ حقیقی سے جا ملے؛ انہوں نے اپنے آخری انٹرویو میں ساتھیوں کی بے حسی اور معاشی مشکلات کا گلہ بھی کیا تھا۔ مئی کے مہینے میں سابق مشہور اداکارہ اور ایمان علی کی والدہ حمیرا عابد انتقال کر گئیں، جنہوں نے پی ٹی وی کے سنہرے دور میں اپنی اداکاری کے جوہر دکھائے تھے۔ ستمبر کے مہینے میں اسٹیج اور ٹی وی کے نامور فنکار لکی ڈیئر 60 برس کی عمر میں پھیپھڑوں اور ذیابیطس کے مرض سے لڑتے ہوئے زندگی کی بازی ہار گئے، جبکہ اسی ماہ معروف اداکار انور علی بھی طویل علالت کے باعث دنیا سے رخصت ہوئے۔ نومبر میں فلم انڈسٹری کے معتبر پروڈیوسر چوہدری کامران اعجاز برین ہیمرج کے باعث وفات پا گئے، جبکہ اکتوبر میں 300 سے زائد فلموں کے خالق اور سینئر رائٹر محمد کمال پاشا بھی دنیائے فانی سے کوچ کر گئے۔ ان تمام شخصیات کی رحلت شوبز انڈسٹری کے لیے ایک ناقابلِ تلافی نقصان ہے جن کی فنی خدمات کو تاریخ میں ہمیشہ سنہری حروف سے یاد رکھا جائے گا۔