ٹھٹھہ (کیو این این ورلڈ/بیوروچیف بلاول سموں) مکلی بائی پاس کے قریب ایک افسوسناک ٹریفک حادثے میں تیز رفتار گاڑی کی ٹکر سے ایک راہگیر جان کی بازی ہار گیا۔ حادثہ اس وقت پیش آیا جب تھر سے تعلق رکھنے والا ہندو کمیونٹی کا ایک شخص، جس کی شناخت ٹھاکر کے نام سے ہوئی ہے، سڑک عبور کر رہا تھا۔ اسی اثنا میں ایک تیز رفتار مزدا گاڑی نے اسے زوردار ٹکر ماری، جس کے نتیجے میں وہ زخموں کی تاب نہ لاتے ہوئے موقع پر ہی جاں بحق ہو گیا۔
واقعے کی اطلاع ملتے ہی مقامی پولیس فوری طور پر جائے وقوعہ پر پہنچ گئی اور لاش کو اپنی تحویل میں لے کر ضروری قانونی کارروائی کے لیے سول اسپتال مکلی منتقل کر دیا۔ پولیس کے مطابق جاں بحق ہونے والے شخص کی تلاشی کے دوران اس کی جیب سے ضروری ذاتی سامان کے علاوہ ایک لاکھ ستر ہزار (1,70,000) روپے کی نقدی بھی برآمد ہوئی ہے، جو پولیس نے اپنی حفاظت میں لے لی ہے تاکہ اسے ورثاء کے حوالے کیا جا سکے۔
پولیس حکام کا کہنا ہے کہ حادثے کا سبب بننے والی مزدا گاڑی کو قبضے میں لے لیا گیا ہے جبکہ واقعے کی مزید تحقیقات کا آغاز کر دیا گیا ہے۔ اسپتال میں ضروری کارروائی کے بعد متوفی کی میت کو اس کے آبائی علاقے روانہ کرنے کے انتظامات کیے جا رہے ہیں۔ حادثے کے بعد علاقے میں ٹریفک کی روانی کو بحال کر دیا گیا ہے اور پولیس ملزم ڈرائیور کے حوالے سے ضابطے کی کارروائی مکمل کر رہی ہے۔