گھوٹکی (کیو این این ورلڈ/ نامہ نگار مشتاق علی لغاری) اوباڑو کے نواحی گاؤں دیوری کا رہائشی نوجوان موٹر سائیکل پر جاتے ہوئے ٹریکٹر ٹرالی کی زد میں آ کر جان کی بازی ہار گیا۔ افسوسناک حادثہ درگاہ سید محمود بادلو شاہ کے قریب اس وقت پیش آیا جب نوجوان چوکماری جا رہا تھا۔
تفصیلات کے مطابق جاں بحق ہونے والے نوجوان کی شناخت عبدالجبار ولد مرتضیٰ گھنڈھو کے نام سے ہوئی ہے۔ عینی شاہدین کا کہنا ہے کہ کماد (گنے) سے بھری ٹریکٹر ٹرالی نوجوان کے اوپر چڑھ گئی، جس کے نتیجے میں وہ موقع پر ہی دم توڑ گیا۔
واقعے کے بعد متوفی کی لاش گھر پہنچتے ہی کہرام مچ گیا اور اہل خانہ شدید صدمے کی حالت میں ہیں۔ نوجوان کے والد کا کہنا ہے کہ حادثہ اتنا اچانک اور شدید تھا کہ عبدالجبار کو سنبھلنے کا موقع ہی نہ مل سکا اور تمام کوششوں کے باوجود اس کی جان نہ بچائی جا سکی۔
ورثاء نے الزام عائد کیا ہے کہ حادثے کے فوری بعد ٹریکٹر ڈرائیور موقع سے فرار ہونے میں کامیاب ہو گیا، جبکہ پولیس کی جانب سے اب تک کوئی ٹھوس کارروائی عمل میں نہیں لائی گئی۔ مقامی افراد نے جائے وقوعہ پر جمع ہو کر انتظامیہ سے ڈرائیور کی فوری گرفتاری کا مطالبہ کیا ہے۔
دوسری جانب پولیس ذرائع کا کہنا ہے کہ واقعے کی تحقیقات کا آغاز کر دیا گیا ہے اور فرار ڈرائیور کی تلاش کے لیے چھاپے مارے جا رہے ہیں۔ اہل علاقہ نے حکومت سے مطالبہ کیا ہے کہ سڑکوں پر گنے سے لدی بے لگام بھاری گاڑیوں کی نگرانی سخت کی جائے تاکہ قیمتی انسانی جانوں کے زیاں کو روکا جا سکے۔