قصور(کیو این این ورلڈ/بیوروچیف طارق نوید سندھو) نفیس کالونی کے قریب سرکنڈوں کے اسٹاک میں اچانک آگ بھڑک اٹھی، جس کی اطلاع ملتے ہی ریسکیو کنٹرول روم نے قریبی فائر اسٹیشن سے امدادی ٹیمیں اور گاڑیاں فوری طور پر جائے وقوعہ کی جانب روانہ کر دیں۔ کالر کے مطابق سرکنڈے تقریباً 12 کنال رقبہ پر جمع تھے اور تیز ہوا کے باعث آگ تیزی سے پھیل رہی تھی جس نے پورے اسٹاک کو اپنی لپیٹ میں لینے کی کوشش کی۔
ریسکیو عملے نے جائے وقوعہ پر پہنچ کر پیشہ ورانہ مہارت کا مظاہرہ کرتے ہوئے نہ صرف آگ پر قابو پایا بلکہ کولنگ کا عمل بھی مکمل کیا تاکہ دوبارہ آگ لگنے کے خدشات کو ختم کیا جا سکے۔ اس بروقت کارروائی کے نتیجے میں 6 کنال رقبہ پر موجود قیمتی مونجھ کو جلنے سے بچا لیا گیا، جس سے مالک کو بڑے مالی نقصان سے محفوظ رہنے میں مدد ملی۔
ابتدائی تحقیقات اور عینی شاہدین کے مطابق آگ لگنے کی وجہ قریبی ٹرانسفارمر میں ہونے والا شارٹ سرکٹ تھا جس کی چنگاریوں نے خشک سرکنڈوں کو آگ لگا دی۔ خوش قسمتی سے اس پورے واقعے میں کسی قسم کا جانی نقصان نہیں ہوا، تاہم سرکنڈوں کا ایک حصہ مکمل طور پر جل کر راکھ ہو گیا ہے۔