راولپنڈی (ویب ڈیسک) بلوچستان کے ضلع قلات میں سیکیورٹی فورسز نے ایک مؤثر انٹیلی جنس بیسڈ آپریشن کے دوران بھارتی پراکسی ’فتنۃ الہندوستان‘ سے تعلق رکھنے والے 8 دہشت گردوں کو ہلاک کر دیا ہے۔ پاک فوج کے شعبہ تعلقاتِ عامہ (آئی ایس پی آر) کے مطابق یہ کارروائی 24 دسمبر کو دہشت گردوں کی موجودگی کی خفیہ اطلاع پر کی گئی، جس کے دوران سیکیورٹی فورسز نے دہشت گردوں کے ٹھکانے کو گھیرے میں لے کر اسے مؤثر طریقے سے نشانہ بنایا۔ شدید فائرنگ کے تبادلے کے بعد بھارت کے حمایت یافتہ 8 دہشت گرد جہنم واصل ہوئے، جن کے قبضے سے بھاری مقدار میں اسلحہ، گولہ بارود اور دھماکا خیز مواد بھی برآمد کر لیا گیا ہے۔ آئی ایس پی آر کا کہنا ہے کہ یہ دہشت گرد علاقے میں معصوم شہریوں اور سیکیورٹی فورسز پر ہونے والی متعدد تخریبی کارروائیوں میں براہِ راست ملوث تھے۔
ترجمان پاک فوج کے مطابق علاقے میں کسی بھی دوسرے بھارتی سرپرست دہشت گرد کی موجودگی کے خدشے کو ختم کرنے کے لیے کلیئرنس اور سرچ آپریشن تاحال جاری ہے۔ یہ آپریشن وفاقی ایپکس کمیٹی کے منظور شدہ وژن ’عزمِ استحکام‘ اور قومی ایکشن پلان کے عین مطابق ہے، جس کا مقصد ملک سے غیر ملکی سرپرستی میں ہونے والی دہشت گردی کا جڑ سے خاتمہ کرنا ہے۔ آئی ایس پی آر نے اپنے بیان میں واضح کیا ہے کہ پاکستان کی سیکیورٹی فورسز اور قانون نافذ کرنے والے ادارے وطنِ عزیز کی مٹی سے دہشت گردی کے مکمل خاتمے تک اپنی مہم جاری رکھیں گے اور کسی بھی بیرونی سازش کو کامیاب نہیں ہونے دیا جائے گا۔