بھارت:رن وے نظر نہیں آ رہا، آخری الفاظ اور پھر دھماکہ،نائب وزیراعلیٰ اجیت پوار طیارہ حادثے میں ہلاک

بارامتی/ ممبئی (کیو این این ورلڈ) بھارتی ریاست مہاراشٹر کے نائب وزیرِ اعلیٰ اور اہم سیاسی شخصیت اجیت پوار بدھ کی صبح بارامتی ایئرپورٹ کے قریب ایک ہولناک طیارہ حادثے میں ہلاک ہو گئے۔ بی بی سی اردو اور ایوی ایشن حکام کے مطابق، ممبئی سے اڑان بھرنے والا چارٹر طیارہ ‘لیئر جیٹ 45’ لینڈنگ کے دوران رن وے کے قریب گر کر تباہ ہوا، جس کے نتیجے میں اجیت پوار سمیت طیارے میں سوار تمام 5 افراد لقمہ اجل بن گئے۔ پونے کے ایس پی سندیپ سنگھ نے تصدیق کی ہے کہ حادثہ صبح 8 بج کر 40 منٹ پر پیش آیا۔ ہلاک ہونے والوں میں اجیت پوار کے ساتھ سمت کپور، شمبھوی پاٹھک، ویدیپ جاڈھو اور پنکی مالی شامل ہیں۔ عینی شاہدین کے مطابق طیارہ گرتے ہی زوردار دھماکہ ہوا اور آگ اس قدر شدید تھی کہ لاشیں ناقابلِ شناخت حد تک جھلس گئیں، جن کی شناخت متوفی کے پاس موجود اشیاء سے کی گئی۔

وزارتِ شہری ہوابازی کی جانب سے جاری کردہ پائلٹ اور ایئر ٹریفک کنٹرول (ATC) کے درمیان ہونے والی آخری گفتگو نے حادثے کی سنگینی کو مزید اجاگر کر دیا ہے۔ ریکارڈنگ کے مطابق پائلٹ رن وے کو تلاش کرنے میں مسلسل دشواری کا سامنا کر رہا تھا۔ پائلٹ نے اے ٹی سی کو بتایا کہ "رن وے اس وقت نظر نہیں آ رہا، نظر آئے گا تو کال کروں گا”۔ کچھ سیکنڈ بعد پائلٹ نے رن وے نظر آنے کی اطلاع دی اور اسے 8 بج کر 43 منٹ پر لینڈنگ کی اجازت دی گئی، مگر اس کے فوری بعد رابطہ منقطع ہو گیا اور رن وے کے قریب آگ کے بلند شعلے دیکھے گئے۔ حادثے کی اطلاع ملتے ہی ایمرجنسی سروسز موقع پر پہنچ گئیں، تاہم ملبے سے کسی کو بھی زندہ نہیں نکالا جا سکا۔ عینی شاہدین کا کہنا ہے کہ طیارہ ایک بار رن وے کے اوپر سے گزر کر واپس مڑا اور دوسری کوشش کے دوران حادثے کا شکار ہو گیا۔

اس بڑے جانی نقصان پر بھارت بھر میں سوگ کی لہر دوڑ گئی ہے اور مہاراشٹر حکومت نے تین روزہ سرکاری سوگ کا اعلان کر دیا ہے۔ وزیراعظم نریندر مودی، راہل گاندھی اور دیگر سیاسی رہنماؤں نے اجیت پوار کی وفات پر گہرے صدمے کا اظہار کیا ہے۔ ڈائریکٹر جنرل سول ایوی ایشن (DGCA) اور ایئرکرافٹ ایکسیڈنٹ انویسٹی گیشن بیورو نے واقعے کی تحقیقات کا آغاز کر دیا ہے۔ واضح رہے کہ تباہ ہونے والا طیارہ دلی کی ایک کمپنی کی ملکیت تھا، جس کا گزشتہ سال ہی آڈٹ ہوا تھا۔ تحقیقاتی ٹیمیں اب اس بات کا جائزہ لے رہی ہیں کہ آیا یہ حادثہ پائلٹ کی غلطی تھی، تکنیکی خرابی تھی یا خراب حدِ نظر (Visibility) اس تباہی کی اصل وجہ بنی۔