ابوظہبی (کیو این این ورلڈ) متحدہ عرب امارات میں ایک افسوسناک ہیلی کاپٹر حادثے کے نتیجے میں اماراتی فوج کے دو اہلکار شہید ہو گئے ہیں، جس کی تصدیق وزارتِ دفاع کی جانب سے جاری کردہ ایک سرکاری بیان میں کی گئی ہے۔
اماراتی وزارتِ دفاع کے مطابق یہ حادثہ اس وقت پیش آیا جب فوجی ہیلی کاپٹر اپنے قومی فرائض کی انجام دہی میں مصروف تھا۔ ابتدائی تحقیقات اور بیان کے مطابق ہیلی کاپٹر میں اچانک تکنیکی خرابی پیدا ہو گئی تھی، جو گر کر تباہ ہونے کا باعث بنی۔
وزارتِ دفاع نے حادثے میں شہید ہونے والے اہلکاروں کے خاندانوں سے گہری ہمدردی اور تعزیت کا اظہار کرتے ہوئے انہیں خراجِ عقیدت پیش کیا ہے۔ حکام کی جانب سے حادثے کی وجوہات کا مزید باریک بینی سے جائزہ لینے کے لیے تحقیقات کا آغاز کر دیا گیا ہے تاکہ تکنیکی خرابی کی نوعیت کا تعین کیا جا سکے۔