اسلام آباد (ویب ڈیسک): ٹیکنالوجی میں سبقت حاصل کرنے والی قومیں ہی عالمی معیشت کی قیادت کریں گی، وفاقی وزیر احسن اقبال
وفاقی وزیر منصوبہ بندی و ترقی احسن اقبال نے "اے آئی رائیز ایکسپو 2025” سے خطاب کرتے ہوئے کہا ہے کہ پاکستان خلائی میدان اور جدید ٹیکنالوجی میں ترقی کے لیے بھرپور جدوجہد کر رہا ہے کیونکہ مستقبل کی عالمی مسابقت کا فیصلہ کوانٹم ٹیکنالوجی ہی کرے گی۔ انہوں نے انکشاف کیا کہ حکومت "اڑان پاکستان” وژن کے تحت ملک کو ڈیجیٹائز کرنے کے لیے "ای پاکستان” حکمت عملی پر عمل پیرا ہے، جس کے تحت کوانٹم کمپیوٹنگ، نینو ٹیکنالوجی اور نیو مینوفیکچرنگ کے تین نئے نیشنل سینٹرز قائم کیے جا رہے ہیں۔ وفاقی وزیر کا کہنا تھا کہ "کوانٹم ویلی” پاکستان کی ڈیپ ٹیک معیشت کا مرکز بنے گی اور مصنوعی ذہانت کو ملکی معاشی طاقت کے نئے انجن کے طور پر استعمال کیا جائے گا تاکہ پاکستان کو ایک ٹیکنالوجی سے لیس مسابقتی قوم بنایا جا سکے۔
احسن اقبال نے مزید کہا کہ برآمدات میں اضافہ، ڈیجیٹل معیشت کا فروغ اور جدت پسندی "اڑان پاکستان” کے بنیادی ستون ہیں، جبکہ ملکی صنعتوں کو عالمی معیار کے مطابق جدید بنانے کے لیے روبوٹکس کا استعمال ناگزیر ہو چکا ہے۔ حکومت اس وقت یونیورسٹیوں میں ہونے والی تحقیق کو براہ راست صنعت اور برآمدی شعبوں سے منسلک کرنے پر کام کر رہی ہے تاکہ سائنسی ایجادات سے معاشی فائدہ حاصل کیا جا سکے۔ انہوں نے واضح کیا کہ سیٹلائٹ ٹیکنالوجی، زراعت، خوراک، تجارت اور مواصلات جیسے اہم شعبوں کو جدید خطوط پر استوار کر کے ہی ملک کو ترقی کی راہ پر گامزن کیا جا سکتا ہے۔ وفاقی وزیر نے اس عزم کا اعادہ کیا کہ پاکستان ٹیکنالوجی کے میدان میں پیچھے نہیں رہے گا اور جدید علوم کے ذریعے عالمی معیشت میں اپنا مقام پیدا کرے گا۔