اسلام آباد (کیو این این ورلڈ):چیف جسٹس آف پاکستان جسٹس یحییٰ آفریدی سے اقوامِ متحدہ کے ایک اعلیٰ سطحی وفد نے ملاقات کی، جس میں پاکستان کے نظامِ انصاف میں عدالتی اصلاحات اور مستقبل کے تعاون پر تفصیلی تبادلۂ خیال کیا گیا۔
چیف جسٹس سے اقوامِ متحدہ کے ریزیڈنٹ کوآرڈینیٹر محمد یحییٰ نے وفد کے ہمراہ ملاقات کی۔ اجلاس میں یو این ڈی پی، یو این ویمن، یونیسف، یو این او ڈی سی اور یو این ایف پی اے کے نمائندے بھی شریک تھے۔ ملاقات کے دوران پاکستان میں انصاف کے نظام کو مؤثر، شفاف اور عوام دوست بنانے سے متعلق اصلاحاتی ترجیحات پر جامع گفتگو کی گئی۔
سپریم کورٹ کی جانب سے جاری اعلامیے کے مطابق چیف جسٹس یحییٰ آفریدی نے وفد کو انصاف تک رسائی بہتر بنانے اور عدالتی کارکردگی میں بہتری کے لیے کیے جانے والے اقدامات سے آگاہ کیا۔ انہوں نے شہری دوست، جامع اور مؤثر نظامِ انصاف کی ضرورت پر زور دیتے ہوئے کہا کہ بروقت اور سستا انصاف جمہوری معاشروں کی بنیادی ضرورت ہے۔
چیف جسٹس نے انصاف کے نظام، گورننس اور احتساب کے باہمی تعلق کو بھی اجاگر کیا اور کہا کہ ایک مضبوط اور خودمختار عدالتی نظام پائیدار ترقی اور جمہوری حکمرانی کی مضبوط بنیاد فراہم کرتا ہے۔ انہوں نے پاکستان میں اقوامِ متحدہ کے مختلف اداروں کے تعمیری اور مثبت کردار کو سراہا۔
ملاقات کے دوران بچوں سے متعلق حساس انصاف، ادارہ جاتی صلاحیت سازی اور عدالتی اصلاحات کے شعبے میں جاری کوششوں پر بھی گفتگو کی گئی، جنہیں چیف جسٹس نے قابلِ تحسین قرار دیا۔ اجلاس میں عدلیہ اور اقوامِ متحدہ کے اداروں کے مابین مستقبل میں تعاون کے امکانات پر غور کیا گیا۔
اعلامیے کے مطابق فریقین نے تکنیکی معاونت، عدالتی تربیت، ڈیٹا پر مبنی اصلاحات، پالیسی سپورٹ اور عالمی سطح پر بہترین عدالتی تجربات کے تبادلے پر تعاون بڑھانے پر اتفاق کیا۔ ملاقات میں اس بات پر بھی زور دیا گیا کہ منظم رابطے اور مسلسل شراکت داری کے ذریعے نظامِ انصاف کو مزید مؤثر اور جدید تقاضوں سے ہم آہنگ بنایا جا سکتا ہے۔