کراچی (کیو این این ورلڈ) اسٹیٹ بینک آف پاکستان نے ملک بھر میں بینکوں کے لیے عام تعطیل کا باقاعدہ نوٹیفکیشن جاری کر دیا ہے۔ جس کے تحت یومِ یکجہتی کشمیر کے موقع پر تمام مالیاتی ادارے بند رہیں گے۔
مرکزی بینک کی جانب سے جاری کردہ نوٹیفکیشن کے مطابق ملک بھر کے تمام کمرشل بینک، ڈی ایف آئیز اور مائیکروفنانس بینک 5 فروری کو عوامی لین دین کے لیے بند رہیں گے۔ یہ چھٹی کشمیری عوام کے ساتھ اظہارِ یکجہتی کے قومی دن کی مناسبت سے دی گئی ہے۔
اسٹیٹ بینک کے اعلامیے میں مزید واضح کیا گیا ہے کہ 5 فروری 2026 کو اسٹیٹ بینک آف پاکستان کے دفاتر بھی بند رہیں گے۔ اس روز بینکوں میں کسی قسم کا لین دین، کلیئرنگ یا دیگر بینکنگ آپریشنز سرانجام نہیں دیے جائیں گے۔
بینکوں کی بندش کے دوران صارفین اپنی ضروریات کے لیے اے ٹی ایم (ATM)، موبائل ایپ اور آن لائن بینکنگ کی سہولیات استعمال کر سکیں گے۔ تمام مالیاتی اداروں کو ہدایت کی گئی ہے کہ وہ اس تعطیل پر سختی سے عملدرآمد کو یقینی بنائیں۔