راولپنڈی (کیو این این ورلڈ) سوشل میڈیا پر ان دنوں راولپنڈی سے تعلق رکھنے والے 60 سالہ حکیم بابر کی شادی کی ویڈیو وائرل ہے، جو اپنی عمر کے فرق کے باعث ٹرینڈنگ میں آ گئی ہے۔ وائرل ویڈیو کے مطابق حکیم بابر نے ایک جوان لڑکی سے نکاح کیا ہے اور اس حوالے سے ان کا کہنا ہے کہ اصل چیز نیت کی سچائی اور رشتے کی قانونی و شرعی حیثیت ہوتی ہے، وہ اس شادی پر بے حد خوش ہیں۔ ویڈیو میں دلہن اور ان کے اہل خانہ بھی اس نئے بندھن پر خوشی و اطمینان کا اظہار کرتے نظر آ رہے ہیں۔
ایکس (ٹویٹر) اور دیگر سوشل میڈیا پلیٹ فارمز پر اس ویڈیو نے نئی بحث چھیڑ دی ہے جہاں صارفین اپنی مختلف آراء کا اظہار کر رہے ہیں۔ صارفین کی ایک بڑی تعداد نے اس فیصلے کو سراہتے ہوئے لکھا ہے کہ معاشرے میں بے راہ روی اور زنا کو عام کرنے کے بجائے نکاح کی سنت کو آسان بنانا چاہیے۔ کمنٹس سیکشن میں نئے جوڑے کے لیے مبارکباد اور دعائیہ پیغامات کا سلسلہ بھی جاری ہے، جس میں لوگوں نے اس بات پر زور دیا ہے کہ اگر دونوں فریقین اور ان کے خاندان خوش ہیں تو عمر کا فرق اہمیت نہیں رکھتا۔
اس وائرل ویڈیو نے جہاں دلچسپ تبصروں کو جنم دیا ہے، وہیں اسے ایک بار پھر سماجی روایات اور شرعی حدود کے تناظر میں دیکھا جا رہا ہے۔ حکیم بابر کے مطابق ان کی زندگی کا یہ نیا سفر باہمی رضامندی اور شرعی اصولوں کے عین مطابق ہے، یہی وجہ ہے کہ ان کے گھر والے بھی اس فیصلے میں ان کے ساتھ کھڑے ہیں۔ سوشل میڈیا پر اس وائرل مواد کو ہزاروں کی تعداد میں دیکھا اور شیئر کیا جا رہا ہے۔